Num 1 | HMO | STEP | Israela taudia ese Aigupito idia rakatania murinai lagani iharuana, ena hua iharuana, bona hua ena dina ginigunana dekenai Lohiabada ese Mose dekenai ia hereva, Sinai ena taunimanima noho lasi gabuna dekenai, Palai Dubu lalonai. Lohiabada ia gwau,

Numbers 1

Israela besena duahia gaukara

1 Israela taudia ese Aigupito idia rakatania murinai lagani iharuana, ena hua iharuana, bona hua ena dina ginigunana dekenai Lohiabada ese Mose dekenai ia hereva, Sinai ena taunimanima noho lasi gabuna dekenai, Palai Dubu lalonai. Lohiabada ia gwau, 2 “Oi bona Arona ese Israela besena ibounai do umui duahia, edia iduhu ta ta, bona ta ta edia tamana edia ruma edia lalonai. Tau ibounai edia ladana do umui torea, 3 edia mauri lagani 20, bona 20 idia hanaia tatau ibounai, Israela tuari taudia totona idia lao diba taudia ibounai.

4 “Iduhu gunalaia taudia do umui abia hidi, iduhu ta ta dekena amo tau ta ta do umui abia hidi, idia ese inai duahia gaukara do idia durua.”

5 Inai duahia gaukara totona Mose bona Arona do idia durua taudia be inai:

Rubena iduhu: Elisuru Sedeuru
6 Simeona iduhu: Selumiele Surisadai
7 Iuda iduhu: Nasona Aminadaba
8 Isakara iduhu: Netanele Suara
9 Sebuluno iduhu: Eliaba Helona
10 Eparaima, Iosepa ena iduhu: Elisama Amihuda
Manase, Iosepa ena iduhu: Gamaliela Pedasuru
11 Beniamina iduhu: Abidana Gideoni
12 Dano iduhu: Ahiesere Amisadai
13 Asere iduhu: Pagiele Okarana
14 Gado iduhu: Eliasapa Reuele
15 Napatali iduhu: Ahira Enana

16 Inai taudia be edia iduhu huana dekenai idia abia hidi vadaeni, edia tamadia edia iduhu gunalaia taudia. Idia be Israela edia iduhu kwarana taudia.

17 Unai taudia be Mose bona Arona ese idia abidia, 18 bona hua iharuana ena dina ginigunana dekenai idia ese Israela oreana ibounai idia haboua. Unai neganai taunimanima ibounai edia ladana, edia iduhu bona edia bese ladana idia torea. Tatau ibounai, edia mauri lagani be 20 idia hanaia taudia edia ladana idia torea, bona idia duahia, 19 Lohiabada ese ia oda hegeregerena. Sinai tano, taunimanima idia noho lasi gabuna dekenai Mose ese taunimanima edia ladana ia torea.

20 Tatau ibounai, edia mauri lagani 20 idia hanaia, edia ladana, edia iduhu, bona edia goada be hegeregere tuari taudia do idia lao taudia edia bese be Mose ese ia torea. Iakobo ena natuna vara guna, Rubena ena iduhu dekenai be inai duahia gaukara idia hamatamaia. Iduhu ibounai bona edia tatau edia momo be inai:

Rubena iduhu: 46,500
Simeona iduhu: 59,300
Gado iduhu: 45,650
Iuda iduhu: 74,600
Isakara iduhu: 54,400
Sebuluno iduhu: 57,400
Eparaima iduhu: 40,500
Manase iduhu: 32,200
Beniamina iduhu: 35,400
Dano iduhu: 62,700
Asere iduhu: 41,500
Napatali iduhu: 53,400
46 Tuari dekenai idia lao diba tatau ibounai be 603,550

47 To idia ese Levi iduhu taudia be iduhu haida danu idia duahia lasi. 48 Badina be Lohiabada ese Mose ia hamaoroa, ia gwau, 49 “Levi iduhu taudia be Israela taudia danu do oi duahia hebou lasi, bona edia ladana do oi torea hebou lasi.

50 “Levi taudia do oi abia hidi, idia ese lau noho ena toana, Palai Dubu, mai ena kohu ibounai do idia naria. Idia ese Palai Dubu mai ena kohu ibounai do idia huaia, bona idia sibona ese Dubu lalonai do idia gaukara, bona idia kamepa neganai, Palai Dubu, be edia palai ruma dekena amo do idia hagegea. 51 Palai Dubu be gabu ta dekenai do umui abia lao neganai, Levi taudia ese do idia atoa diho, bona gabu matamata dekenai umui ginidae neganai, Levi taudia ese do idia haginia lou. Bema idau iduhu tauna be Palai Dubu kahirakahira ia raka mai neganai, do umui alaia mase.

52 “Israela taudia be edia iduhu ta ta dekena amo do idia kamepa, iduhu ta ta edia kamepa, edia kamepa gabudia dekenai, bona iduhu ta ta be mai edia pepe danu.

53 “To Levi taudia ese edia palai rumadia be Palai Dubu kahirakahira do idia haginia hagegea, Palai Dubu do idia gimaia totona. Badina be bema tau ta be egu Palai Dubu kahirakahira do ia raka, egu badu ese Israela taudia do ia hadikaia diba.”

54 Israela taudia ese unai bamona idia karaia, Lohiabada ese Mose dekenai ia hadibaia hegeregerena.